今次九男女組合台北遊算係有刻意嘅安排，主要係食嘅方面。以往經驗話我知，普遍活動範圍都係大安區，所以酒店都揀咗喺大安嘅丹迪旅店。大安丹迪喺TripAdvisor嘅評分頗高，所以都有所期待。由於有台灣朋友幫手，所以幫忙將我哋book嘅房grade升咗呢，可以住對住大安森林公園嘅房間。旅店外貌普通，但無論大堂，走廊，房間，及最重要嘅洗手間都非常光猛乾淨，亦都係我哋所要求嘅。
下晝巡例到西門町逛逛，食吓阿宗面線，山豬肉腸，等。第一個晚餐係延吉街陝西秦味館，係台灣少有專賣西北風味同仿古嘅菜色。未入門口一股勁騷味撲入鼻裡面，我其實麻麻地喜歡咁濃味嘅北方菜，不過朋友介紹，就試試！鐘意重口味嘅朋友，尤其食得麻辣，勁騷味嘅一定會喜歡，不過真係唔係我杯茶!
晚飯後，一行十二人，去咗一間好特別嘅drinking place，叫Fourplay，位於大安區東豐街。2011年開業，店名由來係有四個愛玩各式創意調酒嘅型男bartender主理，所以叫Fourplay。朋友話，呢度頗受女士歡迎，因為好多調配嘅cocktail或飲品都係用水果調製。Fourplay本身都係餐廳，有pasta同小食供應。
未睇menu，朋友先order咗一盤創意調品Drugs Set「毒品系列」。一套七款，每款都有自己特色同飲法！
第一杯大麻酒：要一口氣用杯子彎嘴嘅吸管吸入整杯酒，再放檸檬片入口。
第二杯K他命：酒杯放喺一塊墊上面，而墊上仲有介開一條條嘅「白粉」，咁又唔駛用鼻吸！先用飲管用口吸光白粉，而shot杯裡面有兩層深淺度嘅酒，上層係比較濃烈的酒，而下層就比較淡香嘅甜酒。要一啖乾杯，再放檸檬片入口。
第三杯海洛英：三支唔同顏色嘅飲品，要「注射」落口到。
第五杯安非他命：顏色好靚嘅cocktail，鮮藍色嘅酒，仲有乾冰冒出，要先用個鼻吸入乾冰，再一啖乾咗佢！呢個算係最易入口！
第六杯MDMA搖頭丸：一杯籃加透明加啡嘅shot，用噴火槍點火，再放粒丸仔落杯shot度，等酒變咗色，再一啖飲咗佢。
可以睇Fourplay自家youtube介紹一下！
跟住嘅「遊戲」就係玩shot，不過玩法好得意，4x5嘅shot入面包括正常shot，仲有加咗甜，酸，苦（苦瓜汁），辣（tabasco)嘅shot，用張napkin冚住，畫哂格仔，猜輸咗要選一格飲，睇你好唔好彩，非常刺激！呢個只係level 1，再加碼可以試試level 2，烈酒更加強！
接住order咗大大小小不同嘅drinks同shots，盡興到不得了！下次到台北一定會再嚟挑戰！不得不提，是晚價錢非常超值，每人只係港幣五百，喺香港飲嘅話，冇一千唔駛落樓！
宵夜時間，我哋去咗十分喜愛嘅林東芳牛肉麵！遊客通常去永康，但自從去過林東芳後，再唔會返去永康！
Photo Album: http://www.flickr.com/photos/13584638@N06/
