台灣通朋友喺香港時俾咗個list，有邊啲食店一定要光顧。其中一間叫「瞞著爹」。好特別嘅名字，點解要瞞住個阿爹去食呢？但喺網上搵地址時先知原來有四家店，於是揀咗八德路二段366巷38號嘅四店，今年四月先開店。落咗的士，行完成條街，間舖呢？無招牌，無指示，明明企正google map所指嘅地點，都見唔到，莫非已關門大吉？無耐，先出發嘅朋友喺一個詭秘嘅地方伸個頭出嚟「呢度呀！」。嘩，駛唔駛瞞阿爹瞞得咁過份呀？門面欠奉，但一搪門，好大個魚缸仲有好精緻嘅佈置。
我哋九個人被安排下一層嘅一間房，非常日式。房間有min charge，而坐低先知四店係京柚子鍋，主要係食海鮮。雖然有肉類選擇，但由於晚餐會有好多肉類，所以午餐專攻海鮮。店員好耐心，慢慢上菜，慢慢調鍋，因為主打「柚子」，鍋裡面加上一大羹柚子醬後再加入高湯。但由於係實在太慢慢，有啲覺得浪費咗時間，整個lunch食咗差唔多兩個鐘！所以趕時間者，都要三思！食物質素唔錯，柚子鍋味道好特別，加上海鮮確實豐富線甜，值得推介嘅店！
 |
| 鍋裡面加上一大羹柚子醬後再加入高湯 |
 |
| 隻海鮮船好大隻呀！ |
 |
| 蟹鉗肉質鮮甜 |
由於諗住下晝專攻五分埔，瞞著爹嘅午餐確實阻礙咗啲時間。上次同妹妹到五分埔真係買到手都軟，多選擇，又平！今次收獲到唔錯，好多貨品都係百幾二百台幣可以買到。由於standard降低，所以多於五百蚊嘅貨都覺得好貴。
台北五分埔離後山埤捷運站大概五分鐘路程，裡面有幾百間小店，喺橫街窄巷穿穿插插，都唔記得自己行過邊。好多店都係做批發，但亦會有零售，價錢相當便宜。今次見好多貨都係韓國入口，所以都唔駛去首爾啦！呀，千祈唔好星期一去呀，嗰日專做批發，唔做零售㗎！
晚餐今晚係去有名嘅燒肉店 - 大腕。為咗幫我book呢餐慶生飯，有個香港好朋友因為認識大腕員工，專登幫我好好安排，訂位，定菜單，令我哋九男女食得好開心。大腕座位唔多，圍住燒烤範圍只有十零廿個位，所以一次book九個真的不容易噢！幫助訂位嘅哥仔本應放假，但都俾面返工，幫手打點好一切先離開，不得不服台灣人嘅親切窩心。我哋其中一個朋友唔食牛肉，大腕都好有心安排牛肉以外嘅肉類同海鮮。大廚好有心機續塊肉燒，你未食完碟上嘅食物，佢唔會放其他食物，非常細心。其間仲跟我哋有講有笑，解釋每種肉類嘅分別，令我哋過咗一個好開心嘅晚上。
 |
| 謝謝你專門回來招呼我們喲！ |
 |
| 好好味嘅牛舌，當然有加推啦！ |
晚飯過後，台灣朋友覺得我哋一定要盡興，再去錢櫃繼續！我哋去咗Sogo錢櫃KTV到零晨兩點多，繼而再去食福德涼麵，店舖位置:台北市興安街76號。超好味，簡單嘅冷麵，伴菜，加沙律醬，認真不得了！推介推介！
0 comments :
Post a Comment