兩日crazy city life之後，今日決定往郊外走一走！book咗架七人van，朝早十點接我哋去九份同十分！司機賴先生好好客，先帶我哋食返個地道早餐永和豆漿。經常眼闊肚窄嘅我哋，今次又叫多咗嘢食，食唔哂！非常surprise食到鹹豆漿，是關我哋以為只不過係平日甜豆漿變鹹，其實餡料非常多，成碗粥一樣，好飽呀！
喺車上面，賴先生不停咁介紹左邊係乜，右邊係乜。但車上嗰九件都冇俾反應，仲hangover緊，瞓哂！
第一站賴師父帶我哋到煤礦博物館，其實我哋對呢個站冇乜興趣，因為無甚特別，所以落車求其影幾幅相就繼續行程。下一個落車站係九份老街，開始我哋一路行，一路食嘅旅程！九份老街喺一條狹窄嘅小巷裡面，兩旁全都係小舖，主要係食店同手信舖，我哋又食臭豆腐，肉丸湯，買花生糖，九曲十三彎之後，行到九份茶坊終於停低歇歇腳，品一品茶。
 |
| 好臭嘅臭豆腐，唔啱我！ |
 |
| 九份茶坊 |
從未試過齋坐品茶，坐低之後，步伐及興奮感覺慢慢停落嚟，淨係覺得好relax，好寧靜，好舒服。我哋點咗兩壺茶，一濃一淡，小二姐姐一邊泡茶，一邊解說茶嘅療效，功用，原來有咁深嘅學問！茶坊外有一個露天平台，行出去可以眺望整個九份，見好多建築物都係依山建成，好一幅圖畫！休息咗個多小時後，要急急腳出發到另一目的地 -- 十分！
 |
| 茶坊露台望出去嘅景色 |
十分離九份大概一小時車程，沿途都係林蔭小路，好靚！下一站係十分瀑布，其實上次到台北都到過呢度，不過上次係坐火車經瑞芳入平溪，路程唔一樣。好有印象嘅一條吊橋，左搖右擺，雖然離地唔高，但都幾刺激！再經過一條火車軌，就到達十分瀑布，入場費承惠NT＄180。
上網搵咗啲資料，十分瀑布有20公尺，寬度約40公尺，乃台灣最寬廣嘅簾幕式瀑布，瀑布下方因水氣瀰漫不散，再經陽光折射後變嘅多彩耀眼，因此瀑布下方深潭又有「彩虹淵」嘅美名。「十分」兩字，因為當初有十戶人家合作無間咁興建家園，因此有了「十分寮」嘅稱呼。
謀殺咗一輪菲林後已經到咗黃昏，今日天氣好熱，陽光猛烈，我哋滴住汗行返上大門跟賴師傅集合，往十分老街。好鐘意老街係因為周邊綠色處處，喺湖邊有條路軌，兩旁都係舊式小店，大多係買天登嘅店舖。天燈有唔同顏色代表唔同意思，例如紅色代表平安祈福、財源廣進，橙色代表大吉大利、鴻圖大展，黃色代表學業順利、戀愛成功，藍色代表一帆風順、馬到成功，紫色代表甜甜蜜。單色100/雙色120/四色150台幣，由遊客決定選乜顏色而寫上心願，當然，好似我哋咁多心願嘅遊客會揀四邊都唔同顏色嘅天登！
 |
| 貪得你吖 |
上次放天登唔算成功，因為放手以後，上升咗冇耐，個天登就燒著咗！今次希望順順利利啦。各人好努力咁寫上自己嘅心願，搞笑啲嘅有「希望中六合彩，一注獨得」，「日日俾仔圍」，我嘅金句「繼續賺錢買花戴」，「今天很開心，所以bom chat chat」，九唔答八！仲有快啲升官發財，快快搵到嘢做，等等。老闆純熟地叫我哋擺好pose幫我哋影相，繼而點火，我哋戰戰競競放手，祈求順利！天登一飛沖天去，好遠好遠，希望好似已交託咗俾神，安樂晒！
0 comments :
Post a Comment